Wasiirka caafimaadka ee dalka Lubnaan, Firas Al-Abyad ayaa shaaciyay in la dilay ugu yaraan 9 xubnood, halka la dhaawacay ilaa 2,750 oo u badan xubnaha ururka shiiciga ah ee Xisbullah, ka dib markii ay ku qarxiyeen taleefanno ay isticmaalayeen.
Ururka isku magacaabay Xisbullaah ayaa war uu soo saaray ku sheegay in maamulka Yahuudda uu mas’uul ka yahay weerarkan dhanka isgaarsiinta ah ee canaasitiisa lagu beegsaday, ururkaan ayaa sidoo kale xaqiijiyay in weerarka ay xubno kaga dhinteen.
Lataliyaha amniga R/wasaaraha maamulka Yahuudda ayaa bartiisa X soo dhigay qoraal uu ku sheeganayo mas’uuliyadda weerarkan balse daqiiqado kaddib ayuu ka saaray.
Dadka ku dhaawacmay qaraxyadan waxaa ka mid ah safiirka dowladda Shiicada ah ee Iiraan u fadhiya wadanka Lubnaan ninka lagu magacaabo Mujtabi Amaani.
Saraakiil ka tirsan Ururka isku magacaabay Xisbullaah ayaa sheegay in taleefannada qarxay badankood dhawaan dalka lasoo geliyay ayna ubadinayaan in qalab lagusoo dhax beeray.
Dagaalka dhanka Tignoolajiyadda ayaa umuuqda mid gaaray heer laysku beegsado taleefannada caadiga ah.
