Inta la hubiyay ugu yaraan saddex xubnood oo ka mid ah shaqaalaha dugsi sare oo kuyaal waqooyi-galbeed ee waddanka Bosnia ayaa lagu dilay toogasho hubeysan oo uu geystay nin shaqaalaha xaruntaasi ka mid ah.
Warbaahinta maxalliga oo soo xiganaysa Booliska Bosnia, ayaa sheegtay in ninka weerarka fuliyay uu dilka xubnahaasi shaqaalaha u adeegsaday qori nooca kuwa darandooriga u dhaca, kaddibna uu is toogtay.
Sidoo kale warbixinno horudhaca ah oo soo baxaya waxay xaqiijiyeen in ninka ka dambeeyay weerarkaasi uu waardiye ka ahaa dugsiga Sanski Most oo ah halka uu weerarku ka gaystay.
Cadnaan Beganovic, oo ah afhayeenka booliska ee gobolkaasi, ayaa warbaahinta maxalliga ah u sheegay in ninka toogashada geystay uu isku dayay inuu nafta is dhaafiyo, balse toogashadii uu isu gaystay ay sababtay in uu dhaawac culus soo gaaro.
Warbaahinta ka howlgasha Bosnia oo faahfaahin dheeraad ah ka bixinaysay weerarkan toogasho, ayaa tilmaantay in toogashadasi ay gallaafatay nolasha maamulihii Iskuulkan, xoghayihii iyo bare dhanka luuqadda English-ka ah ee iskuulkaasi.
