Inta la hubiyay 5 xubnood ayaa ku dhintay shil ka dhacay qaybo ka mid ah ismaamulka Nakuru ee dalka Kenya, sida ay soo sheegtay warbaahinta maxalliga ah.
Shilkan gaari ayaa sidoo kale lasoo wariyay inay ku dhaawacmeen dhowr xubnood oo kale, dhacdadaasi ayaana si gaar ah looga soo tabiyay aagga Subukia ee ismaamulka Nakuru.
Wararku waxay sheegayaan, in gaari nooca xamuulka oo Alwaax siday uu waddada ka baxay, taasi oo keentay in uu jiiro 2 ruux oo mooto saarnaa, ka dibna waxa uu ku dhacay qof kale oo waddada gudbayay, sida lasoo xaqiijiyay.
Dhanka kale, ugu yaraan 2 xubnood ayaa lasoo wariyay inay ku dhinteen deegaan ka tirsan ismaamulka Vihiga ee isla waddanka Kenya, halkaas oo sidoo kale ay waxyeello soo gaareen 58 qof oo kale, kuwaas oo cisbitaal la dhigay.
Ilo wareedyo ayaa soo sheegay in dadkan ay cuneen raashin sumeysan, wararku waxay intaas ku dareen in 58-da xubnood ee xaaladdooda lala tacaalayo la geeyay cisbitaalka degaanka Emuhaya ee dhaca ismaamulka Vihiga.
