War rasmi ah oo kasoo baxay Imaarada islaamiga ah ayaa lagu mamnuucay shaqadii ay dalka Afghanistan ka hayeen Idaacadaha BBC-da iyo VOA-da.
Wasaaradda warfaafinta dowladda Islaamiga ah ee Afghanistan ayaa albaabada isugu laabtay dhammaan xarumihii ay warbaahinnada BBC iyo VOA ku lahaayeen wadanka waxayna soo saartay amar ah in aan labaahin karin wararka iyo barnaamijta labadaas hay’adood ee laga leeyahay dalalka Ingiriiska iyo Mareykanka.
Adeegga BBC-da ee luqadda Bashtuuga ayaa xaqiijiyay in lamamnuucay dhammaan barnaamijyadii ay ku baahin jireen dalka Afghanistan laga bilaabo maalintii Axadda.
Cabdulxaq Xammaad oo ah afhayeenka wasaaradda warfaafinta iyo thaqaafada Imaarada Islaamiga ah ayaa sababta ay umamnuuceen VOA iyo BBC ku sheegay in ay halis ku ahaayeen diinta iyo dhaqanka muslimiinta Afghanistan.
Labadan hay’adood oo laga leeyahay Mareykanka iyo Ingiriiska ayaa 20-kii sano ee uu dalku gummeysiga ku jiray waxay baahinayeen warar ay ku durayaan jihaadka balse waxay cadaawadooda sii laba jibaareen markii ay Taliban xukunka qabsatay sanaddii 2021.
Amarka Taliban ayaa durbadiiba dhaqan galay dhammaan Telefeshinnadii iyo Idaacadihii maxalliga heshiisyada wadashaqeyneed lalahaa VOA iyo BBC ayaa joojiyay in ay baahiyaan wararkooda.
Jihaazka amniga iyo istikhbaaraatka Imaarada Islaamiga ah ayaa uxilsaaran fulinta amarkan, waxaa xusid mudan in isbuucyadii lasoo dhaafay ay warbaahinta reergalbeedka aad udhaleecaynaysay tadbiiqinta xuduudda Sharciga ah iyo wasaaradda wanaag farista iyo xummaan reebista ee ay Imaarada Islaamiga ah dhistay.
