Wararka ka imaanaya magaalada Cape Town ee waddanka Koonfur Africa ayaa sheegaya in kooxo burcad Koonfur Afrikaan ah ay weerar ku qaadeen goob ganacsi oo ay Soomaalidu ku leedahay magaaladan kana afduubteen gabar Soomaali ah oo ku sugnayd goobta ganacsi.
Ilo wareedyo laga soo xigtay Soomaalida ku ganacsada Koonfur Africa ayaa soo sheegay in koox burcad ah oo ka kooban 5 xubnood ay afduubteen gabar yar oo da’deedu tahay 15 sanno.
Gabadha ay burcaddu afduubteen ayaa sida la sheegay wakhtigaasi ku mashquulsanayd goobta ganacsi oo uu milkiyadeedu lahaa aabaheed, Waxaana dhacdadan warbaahinta la wadaagay sargaal ka tirsan ciidanka Booliska oo aan faahfaahin intaa ka baxsan bixin.
Ciidamada booliska oo lagu eedeeyo inay kaalin wayn ku leeyihiin boobka, dilalka iyo afduubka ka dhanka Soomaalida ganacsiyada ku leh waddanka Koonfur Africa ayaan qaadin wax tallaabo ah oo ku aadan dhacdadan.
Dalka Koonfur Africa waa waddanka ugu badan ee ay ka dhacaan dilalka iyo boobka ka dhanka Soomaalida, Waxayna tani qayb ka noqonaysaa falalka lagu beegsanayo Soomaalida waddankaasi.
