Wararka ka imaanaya magaalada Nayroobi ee caasimadda Kenya ayaa sheegaya in dab gaystay khasare kala duwan oo isugu dhimasho, dhaawac iyo burbur hantiyeed uu ka kacay dhismeyaal isku raran ah oo kuyaal magaaladaas.
Dhacdooyinkan dabka ah oo ka kala kacay illaa 2 dhisme oo kuyaal, xaafadaha Islii iyo Majengo deegaanka Kamukunji ee caasimadda Nayroobi, ayaa la xaqiijiyay inay ku dhinteen ugu yaraan labo qof oo midi yahay wiil saddex sanno jir ah.
Warbaahinta ka howlgasha gudaha waddanka Kenya ayaa soo sheegtay in dabka ka kacay dhismaha saddexaad dabaq kuyaal xaafadda ay somalidu ku badan tahay ee Islii uu ku dhintay wiil 3 sanno jir ah oo magaciisa lagu soo koobay Xusen Faarax.
Shilalkan dabka ah oo ahaa kuwa isku raran ah misena hal mar lasoo wada tabiyay ayuu boolisku sheegay inay soo gaareen illaa siddeed dhacdo kale oo la xiriira shilalka dabka, ayna soo tirakoobeen dhimashada labada qof iyo dhaawaca 7 kale.
Marka laga soo tago khasaaraha dhimasho iyo midka dhaawac waxaa dhinac kale la soo tabiyay khasaare hantiyeed iyo burbur soo gaaray dhismeyaasha uu dabku ka kacay.
Lama soo sheegin sababta rasmiga ah ee ka dambeysay kicitaanka shilalkan dabka ah, wallow uu boolisku sheegay inay ka dhasheen aalado qarax sameya oo ku dhex jiray dhismeyaasha uu dabkaasi ka kacay.
Ma ahan dhacdooyinkii ugu horreeyey oo laga soo tabiyo caasimadda Nairobi, balse arrinta xusidda mudan ayaa ah in aan horay loo soo tabin 10 dhacdo oo shilal ah oo hal mar ka wada kacay waddanka Kenya.
