Inta la ogyahay ugu yaraan hal qof oo Kenyaanti ah ayaa dhintay halka tiro inaasi ka badanna ay dhaawacyo kala duwan soo gaareen ka dib shil fool xun oo laga soo calaamadiyay deegaan dhaca ismaamulka Kisii ee waddanka Kenya.
Saraakiisha ciidanka booliska saliibiyiinta Kenya ayaa warbaahinta maxalliga ah u sheegay, in shilkan uu yimid ka dib markii gaari nooca Bus-ka loo yaqaan oo ay la socdeen dad Rakaab Kenyaan ah uu ku dhacay wabiga ismaamulka Kisii.
Amos Ambasa oo ah taliyaha saldhigga Kisii ayaa xaqiijiyay in shilkan uu ku dhintay ugu yaraan hal qof oo Kenyaan ah, halka kuwa kalena ay dhaawacmeen, iyadoo uu sheegay in lasoo badbaadiyay badi dadkii rakaabka ahaa, wallow uu sheegay inay suuragal tahay in khasaaruhu sii kordho.
Gaariga Bus-ka ayaan lagu guuleysan in laga soo saaro Webiga Ismaamulka Kisii sida uu sheegay taliska booliska, waxaana suuragal ah inay jiraan dad kale oo ku xanniban gunta biyaha maadaama uu gaarigu ku dhacay wabiga.
Shirkada gaadiidka basaska ee loo yaqaan Modern Coast ayaa qoraal kooban oo ay soo saartay ku sheegtay in 43 ka mid ah rakaabkii la socday gaariga Bus-ka ay soo badbaadeen, waxayna cilladu ku sheegtay argaagx ku dhacay wadaha gaariga taas oo keentay in uu lumiyo hoggaaminta Bus-ka ka dibna uu ku dhaco wabiga.
Shilkan ka dhacay ismaamulka Kisii ee waddanka Kenya ayaa kusoo beegmaya xilli bartamihii bishan shil ka dhacay buundada wayn ee xiriirisa magaalooyinka Nakuru iyo Eldoret ay ku nafwaayeen 8 qof oo Kenyaan ah, halka 20 kalena ay dhaawacyo soo gaareen.
