Dab aad u xooggan ayaa xalay ka kacay suuqa ganacsi ee ugu wayn Soomaaliya ee Bakaaraha, kaas oo si wayn u saameeyay hantida dadweynaha, ka dib markii uu dabkan kusii fiday dhismeyaal ballaaran.
Dabka oo sida la sheegay ka dhashay korantada ayaa markii ugu horreysay abaare fiidkii hore ee xalay laga soo tabiyay halka loo yaqaan Xalwo Baariyow gaar ahaan qaybta dahablaha, wallow uu markii dambe ku sii fiday xarumo kale, isagoo halkaas ka gaystay khasaare baaxad leh oo u badan burburka hantida Soomaalida.
Gurmad iyo dedaallo xooggan oo ay sameeyeen ganacsatada iyo dadka rayidka ah ee ku baxay musiibadan, ayaa dhalisay in ugu dambayn la hakiyo dabka, iyadoo intii uu socday uu gaystay burbur baahsan, wallow uusan jirin khasaare nafeed.
Burburka ugu xooggan ayaa lasoo wariyay in uu soo gaaray qaybta lagu iibiyo maacuunta, goobjoogeyaal iyo ganacsato ku sugnaa goobta ayaa sheegay in uu dabkaasi gaystay khasaare kala duwan.
Bishii April 2019-kii ayay ahayd markii uu dab xooggan ka kacay suuqa wayn ee Bakaaraha gaar ahaan halka loo yaqaan Cabdalla Shideeye, billowga April sannadkii ina dhaafay ee 2022-kii, ayay ahayd markii uu dab aad u xooggan ka kacay suuqa wayn ee Waaheen ee kuyaal magaalada Hargaysa, kaasi oo gaystay burbur hanti oo aad u badan oo lagu qiyaasay malaayiin Dollar.
