Tan iyo gelinkii dambe ee Isniintii shalay dhowr gobol oo ka tirsan Maraykanka ayaa lasoo wariyay inay marti galiyeen toogashooyinkii ugu badnaa abid oo dhaca muddo kooban, kuwaas oo gallaaftay nolasha labaatameeyo qof oo Amerikaan ah.
Weerarada oo ahaa illaa 3 weerar oo toogasho ah waxay kuwii ugu horreeyay casir liiqii shalay ka dhaceen magaalada Half Moon Bay, ee dhacda waqooyiga California, halkas oo lagu dilay 7 qof oo ameerikaan ah, halka mid kalana uu dhaawac culus soo gaaray, sida laga soo xigtay warbaahinta Mareykanka.
Saraakiisha ciidamada Booliska ayaan si rasmi ah u xaqiijin tirakoobka rasmiga ah ee ka dhashay labadan toogasho ee ka dhacay gobolka California, maamulka ayaa laga soo xigtay inay xabsiga dhigeen qof 67 jir ah oo looga shakiyay in uu ku lug lahaa weeraradan ka dhacay magaalada Half Moon Bay.
Goobjoogeyaal ay warbaahinta caalamiga ah soo xigatay ayaa soo sheegay in 2 weerar ay ka dhaceen labo beerood oo isku dhow dhow oo kuyaal magaalada San Francisco ee gobolka California.
Toogashada saddexaad ayaa lasoo wariyay inay ka dhacday gudaha xarun wax barasho oo kutaal magaalada Dimoan, ee gobolka Iowa ee waddankaasi Maraykanka, halkaas oo lagu dilay ugu yaraan 2 arday iyo dhaawaca mucallim bare ka ahaa mid ka mid ah dugsiyada Dimoan.
Dhaawaca mucallimka waxaa barbar socday dhaawacyada saddex kale oo mid ka mid ah ay xaaladdiisu tahay mid aad u laadato, waana toogashooyinka ugu badnaa abdi oo muddo kooban laga soo tabiyay waddanka Maraykanka.
