Amni darrada ka jirta waddanka Kenya ayaa marba marka ka dambeysa faraha kasii baxaysa, Kenyaankuna waxay markan billaabeen inay naftooda la cararaan, kadib markii qaybo ka mida waddankaasi ay dilalku caadi ka noqdeen.
Xaaladda ugu adag ee amni xumada ayaa lasoo sheegayaa inay ka taagan tahay ismaamulka Samburu ee waddanka Kenya, halkaas oo saacadihii lasoo dhaafay ay isaga barakaceen boqollaal qoysas oo Kenyaan ah.
Warbaahinta gudaha ee waddanka Kenya oo soo xiganayso ilo wareedyo ku sugan ismaamulkaas ayaa sheegtay in barakaca dadka Kenyaanka ah uu salka ku hayo beegsiga ay ismaamulladaasi ka wadaan kooxaha hubeysan ee burcadda ah.
300 oo qoysas Kenyaan ah ayaa la xaqiijiyay inay isaga barakceen tuulo lagu magacaabo Nolker oo dhacda galbeedka ismaamulka Kenya ee Samburu, ka dagaal markii ay soo wajahday cabsi ay ka qabaan inay soo weerarraan burcadda hubeysan ee dilalka u gaysata dadka iyo dhaca xoolaha.
Barakacayaashan Kenyaanka ah ayaa maciin biday inay gabbaadsadaan deegaannda ka fog fog Nolker, halka ay sidoo kale xirmeen goobihii waxbarashada.
Dhowaan ayay ahayd markii kooxo hubeysan oo lagu tilmaamay inay yihiin burcad hubeysan ay saddex qof ku dileen deegannada Poro iyo Loborngare ee dhaca galbeedka ismaamulka Samburu, halkaas oo ay sidoo kale ka dhaceen bannaanbaxyo looga soo horjeeday dilalka ka dhanka ah dadka deegaanka.
