Wararka ka imaanaya dalka Yugaandha ee dhaca bariga qaaradda Africa ayaa sheegaya in waziir ka tirsan dowladda Yuweri Musefeni lagu dhex dilay gudaha hoygiisa oo kuyaal magaalada caasimadda ah ee Kampala.
Waziirkan Ugandeska ah ee la khaarajiyay oo lagu magacaabi jiray Charles Angola ayaa xukuumadda Kampala ugu magacownaa waziiru dowlaha wazaaradda difaaca, waziirkan ayaana horay usoo noqday sarkaal sare oo ka tirsana ciidanka millatariga oo uu ka gaaray darajada Kornayl, wallow uu xilligan ahaa sarkaal howlgab ah.
Warbaahinta maxalliga ah ee Ugandha ayaa sheegtay in waziirkan uu ku baxay gananta waardiyihiisa gaarka ah ka dib markii soo kala dhex galay khilaaf xooggan, khilaafka labadan nin oo aan si rasmi ah loo shaacin halka uu salka ku hayo ayaa haddana warar soo baxaya waxay sheegayaan in khilaafka dilka dhaliyay uu xiriir la leeyay mushahaar la’aan soo wajahday waardiyaha.
Ilo ka agdhawaa guriga waziirka ayaa sheegay in xilliga ay toogashadu dhacaysay uu waardiyuh ku qaylinayay erayo ay ka mid yihiin wax mushaar ah ma qaadan mudo dheer iyo erayo kale, taasi oo muujinaysa mushahaar la’aanta ilaalada waziirka.
Dilalka madaxda iyo saraakiisha ciidan ayaa caadi ka ah dalka Yugaandha, sannadkii 2021-kiina taliyihii hore ee ciidamada Uganda ayaa la dhaawacay halka la dilay gabadhiisa, kadib markii kooxo hubeysan ay rasaas ku fureen gaari ay saarnaayeen oo marayay magaalada Kampala.
