Saddex Sarkaal oo ka tirsan ciidanka Itoobiya ayaa lagu khaarijiyey gobolka Amxaarada 24kii saac ee lasoo dhaafay, taas oo sare u sii qaadaysa xiisad ka taagneyd gobolka oo maalmahan ka dhex aloosaneyd qowmiyadda Axmaarada iyo xukuumada Addis ababa.
Dilkan oo ka dhacay mandiqadda loo yaqaano Gojam ayaa lagu khaarijiyey saddexda sarkaal ee kala ah taliyihii sirdoonka ee mandiqadda Shewa Robit, Taliyihii police ee magaalada Dejen Wareda iyo taliyihii waaxda dambi baarista ee deegaanka Gojam.
Arrintan ayaa kusoo beegmeysa iyadoo dhawaan ciidamada dowladda Itoobiya ay dilal iyo raaf ka geysteen deegaanadaasi, ayna beegsadeen dad u badan Beeraleey.
Mucaaradka qowmiyadda Amxaarada oo talaabadaas ku tilmaamay isri sifeyn ka dhan ah qowmiyadooda ayaa sheegay in ay saameyn doonaan falal aargudasho ah.
Maleeshiyaadka Amxaarada ee loo yaqaano FANO ayaa lagu eedeynayaa dilalka ka dhanka ah saraakiisha ciidanka Itoobiya, kuwaas oo toddobaadyadii lasoo dhaafay siyaabo kala duwan loogu beegsanayay deegaano katirsan gobolka Amxaarada.
Dagaalkii Sokeeye ee 2020-kii ka qarxay Itoobiya, ayaa raad xun ku reebay qowmiyadaha kala dhaqanka iyo kala diimaha ah ee kunool wadanka Itoobiya, waxaana markii lasoo afjaray colaaddii qowmiyadda Tigreega ay haddana dowladda Itoobiya wajaheysaa kacdoon kale oo kaga imaanaya dhanka Amxaarada, kuwaas oo aan ku qanacsaneyn xukunka Abiy Axmed, waxayna u arkaan nin u xaglinaya qowmiyahadda Oromada ee uu ka dhashay.
