Inkastoo socdaalka taliyaha dowladda Kenya uu daarran yahay arrimo fara badan haddana waxaa jirta in (DF) dhankeedana ay uga faa’iideysatay hal qodob oo kaliya, kaas oo saameynaya Soomaalida ku nool waddanka Kenya.
Baaritaan iyo dabaggal dheer oo aan ku sameynay kulamo ay Xasan Sheekh iyo Mahad Salaad la qaateen, taliyaha sirdoonka Kenya Nuuradiin Maxamad Xaaji, ayaa waxaan ku ogaanay in Kenya laga dalbaday in ay xirxirto siyaasiyiin dhowr ah.
Ilo wareedyo kala duwan oo lagu kalsoon yahay ayaa si isku mid ah inoogu sheegay in DF ay ka cabatay siyaasiyiin dhowr ah oo ku sugan magaalada Nairobi iyo kulamada iyada ka dhanka ah ee halkaas lagu qabto.
Taliyaha sirdoonka Kenya ayaa u ballan qaaday Xasan Sheekh in uu xabsiga u taxaabi doono siyaasiyiin dhowr ah oo aanan wali magacyadooda helin iyo rag ganacsato ah, wuxuu sidoo kale ka ballan qaaday in aan Nairobi lagu qaban doonin shirar isaga lagu mucaaradayo, laga billaabo maalinta uu heshiiskoodu dhaqan galayo.
“Walaalow waxaan kuu sheegayaa in loo fulinayo dhammaan danaha Kenya ee Soomaaliya, xataa dhanka sirdoonka iyaga waxaa laga balan qaaday in loo xiro dadka kasoo hor jeeda ama diyaarad loo saaro oo loo gacan geliyo sidii qalbi-dhagax, laakin warkan aan kuu sheegay ee ah in siyaasiyiin iyo ganacsato lagu beegsan doono Kenya waxaad ogaan doontaan todobaadyada soo socda” sidaasi waxaa yiri sarkaal ku sugan Muqdisho oo naga codsaday inaanan magaciisa sheegin sababo la xariira ammaankiisa.
Ilaha aan warkan ka helnay waxay xusayaan in Villa Soomaaliya ay dhaqaale badan ku bixineyso sidii uu u fuli lahaa qorshahan, waxaana la dajiyay xeelad ah in xariga iyo beegsiga siyaasiyiinta lagu billaabo dad Muqdisho ka cararay oo Islii iyo Westland deggan oo ay dowladdu ku eedeeneyso iney lacago musuqmaasuqeen, kadib-na la la beegsado dadka asalka hadafka u ahaa ee mucaaradka ah.
Xogtu waxay intaas ku dareysaa in Xasan Sheekh uu ka cawday kulamo bilihii lasoo dhaafay ka dhacay magaalada Nairobi oo uu kamid yahay kulankii ay yeesheen siyaasiyiinta beesha Xawaadle iyo hadalladii garnaqsiga ahaa ee uu halkaas ka jeediyay Yuusuf Dabageed. Sidoo kale Mahad Salaad ayaa ka cawday dad badan oo Nairobi kasoo hadlay iyagoo dibadda soo dhigaya ceebaha ay leedahay hey’addiisa kuwaasoo uu ka xusay wariye Cabdalla Muumin.
Xasan Sheekh iyo Mahad Salaad ayaa caasimadda Kenya u arkay meel hoy u ah siyaasiyiin badan oo mucaarad ah iyo meel marin u ah inta badan dadka Soomaalida ee dibadaha u safra, waana taas midda keeneysa iney xoogga saarto si ay ugu fududaato iney cadaadiso siyaasiyiinta iyo dadka dhaliishan noocyadooda kala duwan.
Haddii ay arrintu sidan u dhaqan gasho waxaa suura gal ah in Kenya ay isaga guuraan siyaasiyiin miisaan leh iyo ganacsato waaweyn oo ay canshuur badan ka qaadan jirtay dowladda wadankaas, waxaa kale uu suura gal ah in ay saameyn ku yeelato safarrada faraha badan ee labada waddan.
Xigasho Radio Alfurqaan.
