Wararka ka imaanaya waddanka Kenya ayaa sheegaya in shil culus oo maanta ka dhacay waddada wayn ee xiriirisa degmooyinka magaalada Mombasa iyo Kilifi ee waddanka Kenya, halkaas oo ay ku dhinteen ugu yaraan afar qof oo Kenyaanti ah.
Wargayska Daily Nation oo ka mid ah wargaysyada kasoo baxa Kenya ayaa sheegay in shilkan oo ahaa mid xooggan uu maanta gelinkii hore ka dhacay waddada isku xirta magaalooyinka Mombasa iyo Kilifi, saraakiisha booliiska ee Kilifi ayaa wargayska u sheegay in shilkaasi uu yimid kaddib markii ay isku dhaceen gaari nooca Mataatuuda iyo mid kale.
Saraakiisha Boolisku waxay intaasi ku dareen in baabuurka kale uu dulmaray gaariga Mataatuuda, taasi ay keentay in goobta ay ku nafwaayaan qoys ka kooban afar qof oo marka dareewalka laga saaro ay saddexda kale yihiin hal qoys oo ka kooban haweenay iyo laba caruur ah oo ay dhashay.
Gaariga shilka galay ayaa lasoo wariyay in uu kasoo baxay magaalada Kilifi kuna sii jeeday magaalada Mombasa ee dhacda gobolka xeebta ah, shilkan ayaan qayb ka ah shilalka gaadiidka ee badanaa ka dhaca gudaha dalka Kenya.
