Masuuliyiin iyo saraakiil ka tirsan dowladda Kenya ayaa xaqiijiyay in saraakiil ciidan oo ka tirsan ciidamada booliska lagu dilay howlgal qarax ah oo maanta ka dhacay deegaan ka tirsan dhulka NFD, ee ku hoos jira gumeysiga Kenya.
Wargayska Daily Nation oo soo xiganaya saraakiil ciidanka oo ka tirsan ammaanka iyo guddoomiyaha Kenya ugu magacaaban ismaamulka Gaarissa ayaa sheegtay in ugu yaraan afar sarkaal oo ka tirsan ciidanka booliska gaarka ah ay ku dhinteen qaraxan oo saaka ka dhacay gobolkaasi.
Solomon Chesut oo ah guddoomiyaha ismaamulka Gaarissa ayaa wargayska Daily Nation u sheegay in saraakiisha la qarxiyay oo ka tirsanaa saldhigga Hagar Dam ee ay degganyihiin ciidanka GSU-da ama booliska gaarka ah ee Kenya, ay gaarigooda la qaraxday miino nooca dhulka lagu aaso, waxayna taasi keentay inay goobta ku dhinteen sarkaalka iyo saddex saraakiil kale ah.
Saraakiisha ayuu wargaysku sheegay inay roondo ka wadeen waddada isku xirta magaalooyinka Faafi iyo Dhadhaab oo ka tirsan gobolka Gaarissa, mujaahidiinta Al-shabaab ayay saraakiishu sheegeen inay ka dambeeyeen howlgalka qaraxa ah.
Saraakiil kale oo ka tirsan booliska gaarka ayaa ku dhaawacmay qaraxan, waxaana dhaawacyada loo qaaday Nairobi, axaddii shalay ayay sidoo kale saraakiisha dowladda Kenya sheegeen in qarax kale oo ka dhacay meel u dhow Faafi lala beegsaday askar ka tirsan ciidanka Kaydka Booliska, saddex askari ayay qirteen in goobta looga dilay.
