Taliska maleeshiyaadka maamulka gumeystaha Yahuudda ayaa saaka oo khamiis ah shaaciyay in sarkaal sare oo ka tirsan ciidanka dhulka ee gumeystaha lagu dilay dagaallada ka socda waqooyiga marinka Gaza, halkaas oo malaaxim adag lagula galay maleeshiyaadka gumeystaha.
War qoraal ah oo kasoo baxay wazaaradda gaashaandhigga ee maamulka isku magacaabay Israa’iil ayay ku shaacisay aqoonsiga sarkaalka ay sheegtay in looga dilay iska horimaadyada hubeysan ee ka socda waqooyiga Gaza, kaasi oo la dilay subaxnimada Khamiista maanta ah.
Sarkaalka lagu dilay dagaallada ka socda marinka Gaza ayay wazaaradda difaaca Yahuudda magaciisa ku sheegay in uu ahaa Yuval Zilber, kaasi oo ah 25 jir kasoo jeeda Ramat Gan, oo ka tirsan magaalada Tal’abiib, ciidanka Yahuudda ayuu kaga aadanaa taliye qayb iyo guuto, sarkaalkan ayaa dhimashada askarta iyo saraakiisha ugu dambeysay ee lagu dilay marinka Gaza ka dhigaya 17 askari.
Duullaanka dhanka dhulka maamulka Yahuudda ayaa u muuqda mid dhiigbax hor leh usoo jiidaya maleeshiyaadka gumeystaha, kooxaha wax iska caabinta Falastiiniyiinta waxay saaka oo kaliya gubeen gaadiid badan oo Yahuuddu doonaysay inay kusoo gasho marinka Gaza, waxayna muqaawamadu horay u sheegtay inay diyaar u yihiin inay dhiig-bixiyaan ciidanka gumeystaha ee kusoo qamaamay marinka.
