Wararka ka imaanaya dalka Kenya ayaa sheegaya in shil cusub uu ka dhacay ismaamulka Taita Taveta oo dhaca gobolka xeebta ah, kaasi oo dhaliyay khasaare kala duwan.
Shilkaan ayaa ka dhacay khadka tareen ee isgoyska Sofia, waxaana uu yimid kaddib markii tareen xowli ku socda uu jiiray wade mooto nooca dhug-dhugleyda ah oo ay waddada ku kulmeen, ilo wareedyo maxalli ah ayaa xaqiijiyay in wadaha uu isku dayay inuu ka gudbo khadka tareenka, sidaasna uu ku jiiray tareenka.
Ninkan ayaa lasoo wariyay in isla goobtaasi uu ku dhintay, taasi oo keentay in tareenkii xamuulka ahaa uu hakad ku galo meel dhowr mitir ku jirta halka uu shilka ku galay.
Maydka wadaha mootada dhugdhugleyda ayaa la geeyey qolka meydka la dhigo ee cisbitaalka magaalada Moi oo ka tirsan ismaamulka Taita Taveta ee gobolka xeebta ah.
