Xiisado colaadeed ayaa maanta laga dareemaya xaafadaha kala duwan ee magaalada Garoowe ee xarunta maamul goboleedka ashahaada la dirirka ah ee isku magacaabay Puntland, halkaas oo ay isku hayaan madaxa maamulkaas iyo kuwa mucaaradka ah ee kasoo horjeeda.
Barqanimadii maanta ayaa mar qura lagu baraarugay gaadiid dagaal iyo maleeshiyaad hubeysan oo kusoo qulqulaya gudaha degmada Garoowe, waxayna taasi keentay cabsi aad u xooggan oo soo wajahday dadka rayidka ah, waxaana durbadii magaalada ka billowday barakac ay samaynayaan dadka shacabka ah.
Muuqaallo iyo sawirro laga soo qaaday gudaha Garoowe ayaa muujinayay dadka rayidka ah oo ku qaxaya gaadiidka noocyadiisa kala duwan, kaddib markii ay arkeen maleeshiyaad is hor fadhiya iyo gaadiid dagaal oo kusoo qulqulaya magaalada.
Siyaasiyiinta mucaaradka ayaa xalay murtad Siciid Deni ku eedeeyay inuu maleeshiyaad fara badan oo daacad u ah kasoo daabulayo magaalada Boosaaso, kuwaas oo ay sheegeen inuu ku doonayo inuu kursiga kusii fadhiyo, waxaase maanta billowday inay isu hub uruursadaan labada dhinac, maleeshiyaad kala taabacsanna soo geliyaan magaalada Garoowe.
Marka laga soo tago xiisadda colaadeed iyo barakca dadka rayidka ah, waxaa dhanka kale muuqaallo lasoo geliyay baraha Inetnet-ka muujinayay shaqaalaha urur gaaleedka qaramada midoobay oo isaga qaxaya degmada Garoowe, kadib markii ay xaaladdu faraha kasii baxday.
Lama oga halka ay ku biyo shuban doonaan xiisadaha colaadeed ee ka taagan degmada Garoowe ee xarunta gobolka Nugaal, taasi oo u dhaxaysa maleeshiyaadka mucaaradka iyo kuwa daacadda u ah madaxa maamul goboleedka Riddada ah ee Puntland.
