Wararka ka imaanaya dalka Uganda ayaa sheegaya in iska hor’maad culus uu qaybo ka mida dalkaasi ku dhexmaray ciidamo hubeysan oo ka tirsan booliska dowladda Uganda iyo dad shacab ah, kaddib markii ay weerar soo qaadeen ciidanka booliska.
Ilo wareedyo deegaanka ah ayaa soo sheegay in ciidanka booliska ay isku dayeen inayxoog ku burburiyaan guryo ay degganaayeen dad rayid Ugaandees ah, waxayna taasi keentay inay ka biya diidaan shacabka Ugaandeeska.
Warbaahinta Uganda ayaa ku warantay in ciidanka ammaanka iyo kuwa booliska ay weerareen deegannada Kiganda Zone iyo Kireka oo hoostaga degamda Kira, waxayna halkaasi ku burburiyeen guryo iyo dukaamo ganacsi oo ay lahaayeen shacab Ugandees ah.
Hal askari oo boolis ah ayaa la xaqiijiyay in uu si xun ugu dhaawacmay isku dhac hubeysan oo ay la galeen dadka deegaanka, dadka shacabka ah ayaa sheegay in lasoo weeraray iyagoo hurda.
“Anigu waxaan ahay nin da’ ah oo jir ahaan naafo ah oo halkan degganaa muddo 10 sano ah, dadkan xaggee bay rabaan inaan aadno” waxaa sidaas yiri mid ka mid ah dadka naafada Ugaandeeska ah ee ay weerareen ciidanka Uganda.
