Dowladda Koonfur Africa ayaa shaacisay in masuuliyiinteedu fadhi ka yeesheen sida laga yeeli lahaa cilaaqaadka uu waddankaasi la leeyahay maamulka gumeystaha Yahuudda ee xasuuqa daran ka gaysanaya marinka Gaza.
Kulankan waxaa yeeshay xubnaha baarlamaanka ee dowladda South Africa, waxayna sheegeen inay uga hadleen sidii laga yeeli lahaa xiriirka waddankooda uu la leeyahay maamulka isku magacaabay Isra’iil.
Kulanka intii uu socday, waxaa billaabatay inay codeeyaan xubnaha baarlamaanka, waxaana ugu dambayn codkii loo qaaday xiriirka Koonfur Africa iyo Yahuudda uu u batay in la jaro xiriirki dublumaasiyadeed ee ay dowladdaasi la leedahay maamulka gumeystaha Yahuudda, waxayna xildhibaannada marka laga soo tago hakin ay sheegeen in la xiro safaaradda Yahuudda.
Waxaa sidaas kusoo xirmay xiriirka ka dhaxayn jiray labada maamul, Koonfur Africa ayaana ku biiraysaa waddamo badan oo hore u jaray xiriirki dublumaasiyadeed ee kala dhexeeyey maamulka gumeystaha Yahuudda.
Maalin ka hor ayay ahayd markii maamulka Yahuudda ee xoogga lagu dajiyay dhulalka muslimiinta ee Falastiin uu u yeeray safiirkiisa u fadhiya safaaradda ay ku leedahay dalka South Africa, maamulkan Yahuudda ayaa tan iyo markii uu xoojiyay duqamaha uu ka gaysanayo marinka Gaza, waxaa uu la kulmay dhabarjab dhanka siyaasaddiisa dibadda ah, marka laga soo tago cadaadisyada gudaha uga imaanaya.
