Wararka ka imaanaya magaalada Qabridahar ee gobolka Qorraxay ee dhulka Soomaali galbeed ayaa sheegaya in shil khasaare nafeed iyo burbur gaystay uu maanta ka dhacay bartamaha magaaladaas, halkaas oo ay ku dhinteen ugu yaraan laba xubnood.
Dad goobjoogeyaal ah ayaa xaqiijiyay in shilkaasi oo ahaa mid ka dhashay mooto bajaajta ay ku dhinteen 2 gabdhood oo lagu kala magacaabi jiray Fardowsa Maxamuud iyo Bishaaro Axmed, oo ka mid ahaa ardayda jaamacadda Qabri-dahar, sidoo kalena uu ku dhaawacmay hal qof oo rag ah.
Sawirro lagu baahiyay baraha bulshada ayaa muujinayay dad badan oo isugu soo xoomay halka uu shilku ka dhacay, waxaana goobta laga qaaday maydadka gabdhaha shilkaasi ku dhintay iyo dhaawaca, kuwaas oo la geeyay xarumaha caafimaadka ee magaalada Qabri-dahar.
Si rasmi ah looma warin sababta ka dambeysa shilkan, balse waxaa loo badinaya dareewalada kaxeeya gaadiidka loo yaqaan mooto bajaajta oo ah kuwa si xowli ah ku socda, taas oo mararka qaar keento inay gallaaftaan nolasha dadka rakaabka u ah.
