Ciidamada ilaalada Kacaanka ee dowladda Iiran ayaa maanta ku dhawaaqay in laga dilay la taliyihii hore waddanka Suuriya, kaddib markii gantaal ay Yahuudda ku garaacday deegaan dhaca baadiyaha Dimishiq ee dalka Suuriya, halkaas oo uu ku sugnaa sarkaalka la khaarajiyay.
Bayaan kasoo baxay taliska ciidanka ilaalada Kacaanka Iiraan ayaa lagu sheegay in la taliyaha Iiraan ee dalka Suuriya, Reza Mousavi oo haystay darajada General, masuulna ka ahaa qaybta Iiraan ee taageerada u fidiya Suuriya, lagu dilay weerar kaga yimid dhanka Yahuudda.
Wakaaladda wararka u faafisa Iiraan ee Tasnim ayaa daabacday, in Reza Mousavi, oo ah Generaalka lagu beegsaday aagga Dimishiq, uu ka mid ahaa taliyayaasha sare ee Iiraan u jooga Suuriya, sidoo kale waa mid ka mid ah la-taliyeyaasha Iiraan ee ugu da’da weyn ee halkaasi ku sugan.
Wakaaladdu waxay intaas raacisay in sarkaalkan si gaar ah loogu beegsaday deegaanka Sayid Zeynab oo ah deegaan dhaca duleedka magaalada caasimadda u ah Suuriya ee Dimishiq, Reza ayay sheegtay inuu ka mid ahaa raggii aadka ugu dhowaa Generaalkii shiiciga ahaa ee horay loo khaarajiyay ee la oran jiray Qaasim Sulaymaani.
Reuters ayaa dhankeeda sheegtay in sarkaalkan Iiraaniga uu ahaa midkii isku duba ridayay howlgallada isku xiran ee Iiraan iyo Suuriya, uuna ahaa saaxiibka dhow ee Qaasim Sulaymaani oo sannado ka hor lagu dilay weerar ay fuliyeen ciidamada Maraykanka.
