Xiisad colaadeed oo xooggan ayaa maanta ka taagan magaalada Garoowe ee xarunta maamul goboleedka ashahaada la dirirka ah ee Puntland, kaasoo salka ku haya tallaabo uu qaaday maamulka hadda talada haya ee uu hoggaamiyo Siciid Deni, kaasi oo maanta shaaciyay in uu dhisay xildhibaannada cusub ee maamulkaasi.
Xubnaha mucaaradka ku ah maamulka Deni ayaa ciidamo fara badan iyo gaadiid dagaal maanta soo dhoobay qaybo ka mid ah degmada Garoowe, kuwaas oo iyagoo gaadiidka dagaalka ku hubeysan lagu arkayay waddooyinka qaar ee magaalada.
Xubnaha mucaaradka ayaa sheegay inay ka hortagayaan boob ay sheegeen in uu wado madaxa maamulka ashahaada la dirirka ah ee Puntland Siciid Deni, xubnaha mucaaradka ee maanta sida adag u hadlay waxaa ka mid ah Cabdiweli Gaas oo ka mid ah xubnaha u taagan xilka madaxweyne ee maamulkaas, waxaana uu sheegay in Deni uu ku talagalay doorasho uu si iskiis isugu caanashubayo, haddii ay yihiin mucaaradkana ay taasi ka digayaan, waa sida uu hadalka u dhigaye.
Gaas oo ka mid ahaa xubno mucaarad ah oo maanta shir jaraa’id ku qabtay Garoowe ayaa sidoo kale sheegay inaysan aqbali doonin doorasho uu qabto maamulka Siciid Deni.
