Mid ka mid ah saraakiisha ciidamada Yahuudda ee duullaanka lugta ah ku qaaday marinka Gaza ee Falastiin ayaa la xaqiijiyay in uu wadne xanuun u dhintay, ka gadaal markii barbarkiisa lagu toogtay oo lagu dilay askari uu taliye u ahaa.
Xogtan waxaa xaqiijisay warbaahinta maamulka Yahuudda, Kanaalka 12-aad ee sahyuuniyadda ayaa warbixin uu soo daabacay ku xaqiijiyay in sarkaal sare oo ka tirsanaa guutada Gifcati oo ka mid ahaa ciidankii uu maamulka Tal’abiib soo geliyay marinka Gaza mar qura laga war helay isagoo mayd ah.
Baaritaanno lagu sameeyay ayaa muujinaya inuusan qabin wax dhaawac, balse wadne xanuun kusoo booday uu u dhintay, kanaalka 12-aad ee gumeystaha ayaa sheegay in sarkaalkaasi uu u adkeysan kari waayay sida askartiisu ugu le’anayaan jiidaha dagaal ee marinka Gaza.
Waxay tani kusoo beegantay, xili warbixin saacado ka hor ay soo saareen ciidamada gumeystaha ay ku xaqiijiyeen in 9,00o oo ciidamadooda ka mid ah ay xaalad nafsi ah ka qaadeen duullaankii dhulka ahaa ee ay ku qaadeen marinka Gaza, Taliska ciidamada Yahuudda ayaa dhankiisa maanta qirtay in afar askari looga dilay iska hor’imaadyo lagula galay koonfurta Gaza, saacadihii lasoo dhaafay ayay ahayd markii uu taliskan qirtay in 9 sarkaal iyo askar looga dilay laba howlgal oo ay kala kulmeen dhanka kooxaha muqaawamada Falastiiniyiinta 24-kii saac ee lasoo dhaafay.
