Saraakiisha ciidamada Mareykanka ee ka howlgala mandiqadda loo bixiyay bariga dhexe ayaa ku dhawaaqay in labo askari oo ka tirsan ciidamadooda badda lagu la’yahay xeebaha Somalia, dhankoodana ay si rasmi ah u billaabeen howlgallo baaritaanno ah.
Taliska dhexe ee ciidanka Mareykanka ee loo yaqaan Centcom ayaa war qoraal ah uu soo saaray ku sheegay in labada askari lagu waayay xeebaha u dhow Soomaaliya, isla markaana ay ciidamo badmaaxiin ah geeyeen mandiqadda ay ka howlgalaan qaybta shanaad ee ciidamada Mareykanka, si ay uga qayb qaataan raadinta askarta kaga maqan xeebaha Soomaaliya.
Baadi-goobka loogu jiro askartan ka tirsan ciidanka badda Maraykanka ayaa kusoo beegmaya, xilli xiisadda gobolka ay tahay mid aad u kacsan, sidoo kale gobolka ayaa marti gelinaya weeraro hubeysan oo lagu beegsanayo maraakiibta reer galbeedka iyo kuwa Yahuudda.
