Khasaare kala duwan oo isugu jira mid nafeed iyo mid maaliyadeed ayaa ka dhashay shil baabuur oo saacadihii lasoo dhaafay ka dhacay deegaan ka tirsan waqooyi bari Soomaaliya, halkaas oo ka mid ah goobaha ay ka dhacaan shilalka gaadiid ee ay dadka ku le’daan.
Shilkan gaari ayaa si gaar ah looga soo wariyay in uu ka dhacay wadada isku xirta magaalooyinka Garoowe iyo Laas-caanood oo ka kala tirsan gobollada Nugaal iyo Sool oo dhaca waqooyi bari Soomaaliya, waxaana shilka uu yimid ka dib markii ay isku dhaceen laba gaari.
Inta la hubiyay waxaa shilkan baabuur ku dhaawacmay saddex xubnood oo ka mid ah uu yahay gudoomiha Riddada Puntland ugu magacaaban degmada Jariiban ee gobolka Mudug, waxaana dhaawacyada dadka la geeyay magaalada Laascaanood ee xarun goboleedka Sool, sida uu sheegay mid ka mid ah dhakhaatiirta ka howlgasha magaaladaasi.
Sawirro iyo muuqaallo lagu baahiyay baraha bulshada ayaa muujinayay burburka xooggan ee soo gaaray gaadiidka isku dhacay, waxayna tani kusoo beegmaysaa xilli dhowaan shil diyaaradeed oo ka dhacay degmada Ceel-barde ee gobolka Bakool ay ku dhinteen duuliyihii diyaaradda iyo qof kale.
