Maamulka dowladda xabashida ayaa lagu eedeeyay in uu xabsiga u dhaadhiciyay xildhibaan ka tirsan baarlamaanka Itoobiya, kaas oo qowmiyad ahaan kasoo jeeda Axmaarada, oo xilligan dagaal adag kula jirta maamulka talada haya ee uu hoggaamiyo Abiy Axmed.
Warbaahinta Axmaaradu waxay sheegtay in maamulka Abiy Axmed uu xabsiga dhigay xildhibaan lagu magacaabo Dessalegn Chanie Dagnew, oo ka mid ah xildhibaannada kasoo jeeda gobolka Amhara, waxayna sheegtay in ninkan uu gudbiyay su’aalo la xiriira xasuuq ciidamo ka tirsan Itoobiya kula kaceen dad aan hubeysnayn oo ka dhacay waqooyiga dalka Itoobiya, kaas oo lagula kacay dad shacab Axmaaro ah.
Dadka Axmaarada ah ayaa wax laga xumaado ku tilmaamay xarigga xildhibaankan, tallaabadan lagu eedeeyay Abiy ayaana cirka isku sii toshay colaadda u dhaxaysa Axmaarada iyo maamulka talada haya.
Dhanka kale, warbaahinta Axmaaradu waxay soo warisay xasuuqyo cusub oo ciidamada millatariga Itoobiya ay ka gaysteen deegaanno ka tirsan gobolka Axmaarada, waxaa lasoo wariyay in ciidamada ka amar qaata Abiy ay si bareer ah u dileen 18 qof oo beeraley Axmaaro ah, weeraradaan ayaana ka kala dhacay deegaannada Lewaye iyo Acheqan ee hoostaga degmada Estie, Koonfurta Gonder ee gobolka Axmaarada.
Goobjoogeyaal ku sugan gobolka Axmaarada ayaa dhanka kale sheegay in 26-kii January iyo 29-kii Januray 2024-ka ay ciidamada Abiy ay si sharci darro ah laba qof oo rayid ah ugu dileen degaan lagu magacaabo Kulmesk ee hoostaga degmada Lasta ee dhacda waqooyiga Wollo, ee gobolka Axmaarada.
