Wararka ka imaanaya gobolka Hiiraan ee dhaca bartamaha Soomaaliya, ayaa sheegaya in xoolo aad fara badan ay ku le’deen deegaanno dhaca bariga gobolkaasi, kaddib markii uu haleelay cudur aan la aqoonsan oo laayaan ah.
Cudurkaan ilma aragtada ah ee aan la aqoonsan ayaa lasoo wariyay in uu xoolaha ka baabi’iyay qoysas lagu qiyaasay 62 qoys oo ka mid ah dadka reer guraaga ah ee ku dhaqan miyyiga degmada Maxaas ee bariga Hiiraan, ilo wareedyo deegaanka ah waxay soo sheegeen in hal qoys oo kaliya ay ka bakhtiyeen 200 oo neef, kuwaas oo iyagoo fara maran galay degmada Maxaas.
Waxaa lasoo sheegay in cudurkan cusub ee soo ritay xoolaha uu yahay mid aan horay loogu arag deegaannada dhaca bariga Hiiraan, waxaana la sheegay in neefka marka uu ku dhaco kadib uu haynayo muddo 24 saacadood ah, kaddib na uu neefku qurbaxayo.
Sidoo kale, waxaa lasoo wariyay in dadka qaar oo eegan kari waayay nafbaxa xoolahooda ay billaabeen inay birta ka aslaan, kaddibna sidaas ku cunaan, balse dadkii cunay hilibka xoolaha la gowracay ayaa lasoo wariyay inay xanuuno soo wajaheen, mana jiro ilaa iyo imika baaritaan rasmi ah oo la sameeyay iyo sababta keentay xanuunkan xoolaha badan ku laayay deegaannada hoostaga degmada Maxaas.
