Dagaallo culus oo lagu riiqmay oo u dhaxeeya jabhadda Axmaarada ee Fano iyo ciidamada dowladda Itoobiya, ayaa ka soconaya dhowr jiho oo dhaca gobolka Ahmara, iyadoo markan uu dagaalku u muuqdo mid kusii jeeda dhanka Addis-ababa oo caasimad u ah Itoobiyaanka.
Dagaallada ugu xooggan ayaa imika ka soconaya duleedka magaalada Bahir-dar ee xarunta u ah gobolka Axmaarada, waxaana halkaas isku haya ciidamo aad u hubeysan oo kala taabacsan jabhadda Fano oo iyadu sheeganaysa in lagu duulay deegaankeeda oo ay is difaacayso iyo millatariga Itoobiya oo isagana sheeganaya in uu dhaqan gelinayo amar kasoo baxay Abiy oo lagu kala diray ciidamada booliska gaarka ah ee ismaamullada waddankaasi.
Khasaare laxaad leh ayaa lasoo warinayaa inay dhinacyadu isku gaysteen, sidoo kale dagaallo culus oo lafa jabis ah ayaa laga soo warinaya degmada Dejen Gojjam oo kutaal waddada dheer ee isku xirta magaalooyinka Addis-ababa iyo Bahir-dar. dagaalkan dambe ee maanta ka qarxay magaaladan ayaana u muuqda mid furinta usoo raray dhanka iyo caasimadda Itoobiya.
Warbaahinta taabacsan jabhadda Fano, waxay sheegtay in dagaallada ka soconaya gobolka ay ku dileen Addisu Mohammed oo ah taliyihii haystay qaybta ciidanka Abiy Axmed ee ka howlgalayay Gojjam, waxayna sidoo kale soo Wabandhigeen sawirkiisa.
