Waxaa sii xoogaysanaya dagaallada culus ee ka socda gobolka Axmaarada ee dhaca waqooyiga Itoobiya, halkaas oo ay ku loollamayaan millatariga xukuumadda Abiy Axmed iyo jabhadda hubeysan ee Fano, dagaallada ayaana kusii fiday oo gaaray magaalooyin hor leh.
Dagaallada xoogggooda waxay ka socdaan Debre Birhan oo ka tirsan gobolka Shewa ee Ismaamulka Axmaarada ee waqooyiga Itoobiya, waxaana halkaas laga soo tabiyay dagaallo culus oo lafa jabis ah oo dhexmaraya millatariga iyo maleeshiyaadka xoraynta dadka Axmaarada ee Fano.
Jabhadda Fano, waxay warbaahinteeda sheegtay in dagaallo culus oo ka dhacay degmada Shewa Robit ay sababtay inay maleeshiyadeeda gudaha u galaan degmadaasi, halkaas na ay ku qabtaan ciidamo aad u fara badan oo ka tirsan kuwa Abiy Axmed ee duullaanka kusoo qaaday gobolkooda.
Jabhadda Fano iyo ciidaka millatariga ayaa sidoo kale si wayn isugu haya maamulka magaalada Bahir-dar ee xarunta u ah gobolka Axmaarada, waxaana gudaha magaaladaasi ka dhacay dagaallo aad u culus oo socda dhowr maalmood, wallow ay Fano guulo sheeganayso, dhanka Abiye na ay ciidankiisa guulo sheeganayaan.
