Inta la xaqiijiyay ugu yaraan toban xubnood ayaa dhintay shil gaari oo laga soo tabiyay waddada wayn ee isku xirta magaalooyinka Nayroobi iyo Mombasa, kaddib markii ay isku dhaceen gaadiid badan.
Ilo wareedyo dhanka deegaanka ah ayaa warbaahinta maxalliga ah u sheegay in shilkan gaari uu yimid kaddib markii ay isku dhaceen ilaa shan gaari, halkaasna ay ku nafwaayeen 10-ka xubnood, sidoo kalena ay ku dhaawacmeen 12 kale, waxaa sidoo kale shilkaasi dadka ku dhintay ka mid ahaa canug 2 sano jir ah.
Madaxa isbitaalka Sultaan Hamuud Dr. Jane Mwende, ayaa sheegtay in halkaasi la geeyay meydadka sagaal qof iyadoo canugga oo ay dhaawacyo culus soo gaareen uu markii dambe geeriyooday.
Mid ka mid ah dhakhaatiirta caafimaadka ayaa xaqiijiyay in dadka dhaawacay ee 12-ka qof ka kooban la geeyay cisbitaalka Makindu, halkaas oo lagu tacaalayo xaaladdiisa caafimaad.
Ilo wareedyo ciidanka booliska ka tirsan ayaa dhanka kale xaqiijiyay in meydadka ugu yaraan 4 qof isla markiiba la helay halka inta kalena laga soo saaray baabuurta shilka ku burburay.
Shilkan khasaaraha kala duwan dhaliyay ayaa la wariyay in uu ka dambeeyay gaari nooca xamuulka ah oo ka yimid Nairobi, kuna jeeday dhanka Mombasa, waxaa la wariyay in gaarigaasi xamuulka ah uu ku dhacay gaari nooca Mataatuuda ah, kaas oo kusii dhacay ilaa 3 gaadiid oo kale oo waddada marayay.
