Hay’adda ururka Qaramada Midoobay u qaabilsan arrimaha qaxootiga ee lagu magacaabo “Unrwa” ayaa maanta si rasmi ah u shaacisay warbixin ku aaddan kiisas dhimasho ah oo laga soo diiwaan geliyay marinka Gaza, oo tan iyo 7-dii Oktoobar wajahaya duqaymo wuxuushnimo ah oo ay gaysanayaan ciidanka maamulka Yahuudda.
Warbixinta hayaddan oo lagu daabacay barteeda “X”, ayaa lagu sheegay in ay heshay warbixinta dhimashada ugu yaraan 2 carruur ah, taasi oo ka dhalatay kulaylka daran ee ka taagan marinka Gaza.
Waxay hayaddu sidoo kale sheegtay in dadka falastiiniyiinta ee ku barakacay dagaalka Gaza ay celcelis ahaan maalintii oo dhan helaan hal litir oo biyo ah, taas oo aad uga yar xaddiga maalinlaha ah ee bani’aadamku iticmaali karo oo lagu qiyaaso 15 litir, marka la eego qiimaynta heerarka caalamiga ah.
Bishii lasoo dhaafay ee Maarso, ayaa lagu dhawaaqay in tirada carruurta lagu dilay Gaza tan iyo 7-dii Oktoobar ay ka badan tahay tirada carruurta lagu dilay dagaalladii adduunka ka dhacay afartii sano ee la soo dhaafay.
