Maydadka ugu yaraan saddex qof ayaa laga soo saaray goob ay daadad kusoo rogmadeen oo kuyaalla Kona Punda oo ku teedsan waddada isku xirta magaalooyinka Gaarisa iyo Madogo, halkaas oo ay ku degtay dooni ay saarnaayeen 45 xubnood, sida ay sheegeen dad goobjoogeyaal ah.
Dhacdadan ayaa dhacday abbaare 6:30 maghribinimadii xalay wakhtiga maxalliga ah ee kenya, waxaana halkaas ku rogmatay mid ka mid ah doomaha aadka u dheereeya oo ay saarnaayeen 45 xubnood, kuwaas oo doonayay inay doonida kaga tallaabaan biyaha xiray inta u dhaxaysa magaalooyinka Gaarissa iyo Madogo.
Kooxaha gurmadka deg degga ah ayaa wargayska The Star ee kasoo baxa Kenya, ayaa u sheegay in ugu yaraan 22 qof oo kaliya ay soo badbaadiyeen kooxaha samatabixinta, halka sidoo kale ay soo saareen maydadka ilaa saddex, walina la la’yahay inka badan 20 kale.
Daadadka ka dhashay roobabka xooggan ee ka da’aya gobolka NFD ee ay dowladda Kenya ula baxday waqooyi bari, iyo fatahaadda uu sameeyay wabiga Taana ayaa keenay inay xiranto waddada isku xirta magaalooyinka Madogo iyo Gaarisa, waxayna taa keentay in dadku bilaabaan in ay isticmalaan doomaha dheereeya, si ay uga gudbaan waddooyinka biyuhu xireen.
Waxay tani kusoo beegmaysaa xilli uu karkaarka jabsaday wabiga Taana, kadib roobabkii lixaadka lahaa ee halkaasi ka da’ayay maalmihii lasoo dhaafay, fatahaadda uu sameeyay wabigaasi ayaa sababay in deegaano badan ay saameyn ku yeeshaan, isku socodkii dadka iyo midka gaadiidkana kala go’aan.
