Kooxda Xuuthiyiinta ee ka dagaallanta dalka Yeman ayaa sheegatay masuuliyadda weeraro cusub oo lagu beegsaday maraakiib nooca wax burburiya oo uu Maraykanku leeyahay iyo doomo kale, kuwaas oo ku sugnaa biyaha badda cas iyo badweynta Hindiya.
Yaxye Sariic, oo ah afhayeenka ciidanka Xuuthiyiinta, ayaa bayaan uu soo saaray ku xaqiijiyay in ciidankiisu qaadeen weeraro dhanka cirka ah oo lagu beegsaday maraakiib Maraykanku leeyahay iyo doomo ku sugnaa biyaha badda cas iyo badweynta Hindiya, oo mid ka mid ah uu leeyahay maamulka Yahuudda.
Yaxya Sariic, ayaa sheegay inay beegsadeen laba markab oo nooca wax burburiya ee dagaalka Maraykanka, xilli ay ku sugnaayeen biyaha badda Cas, howlgalkaas ayuu sheegay in uu najaxay, howlgalka 2-aad ayuu sheegay in ciidankiisu ku beegsadeen laba markab oo kale, kuwaas oo mid ka mid ah oo Yahuuddu leedahay uu marayay biyaha badweynta Hindiya, halka tan kalena aan la haynin huwiyadeeda, taas oo lagu beegsaday biyaha badda Cas.
Xuuthiyiinta ayaa sii kordhisay weeraradeeda ka dhanka ah Maraykanka, Yahuudda iyo Ingiriiska, laba cisho ka hor ayay ahayd markii kooxda Xuuthiyiintu ay dhulka soo dhigeen diyaarad nooca kuwa aan duuliyaha lahayn ee MQ9 ee Maraykanku leeyahay, taasi oo dul heehaabaysay hawada gobolka Sacda ee dalka Yeman. kaddib markii ay gantaal la heleen diyaaraddaasi.
