Ugu yaraan 20 qof oo Falastiiniyiin ah ayaa ku shahiiday, halka kuwo kalena waa ay dhaawacmeen, kaddib markii ciidanka gumeystaha Yahuudda ay Xasuuq cusub ka geysteen xero ay ku noolaayeen dad barakacayaal ah oo ku taalla deegaanka Al-Mawasi ee magaalada Rafax ee koonfurta marinka Qaza.
Ciidamada gumeystuhu waxay sidoo kale duqeeyeen cisbitaalka Kamaal Cudwan oo kuyaal mandiqadda Bayt Laahiya ee waqooyiga marinka Gaza, halka sidoo kale ay ciidanka Yahuuddu go’doomiyeen cisbitaalka Al-Yemen Al-Saciid ee kuyaal xerada Jabaaliya.
Goobjoogeyaal ku sugan Gaza ayaa sheegay in ciidamada sahaayinadu ay muddo 48 saac gudahood ku dileen 72 qof oo barokacayaal Falastiiniyiin ah, kuwaas oo ay ku duqeeyeen teendhooyin ay ku lahaayeen goobo ay ciidanka gumeystuhu ku sheegeen inay nabad yihiin.
Maalin ka hor ayay ahayd markii xasuuq daran oo ciidamada Yahuuddu ka gaysteen xero barakac oo kutaalla Rafax ay ku shahiideen inka badan 45 qof oo Falastiiniyiin ah oo u badan haween iyo caruur, halkaas oo ciidanka Yahuuddu ay ku tuureen bambooyinka wax guba.
