Waalidiinta, maamuleyaasha xarumaha waxbarasho iyo qaybaha kala duwan ee bulshada magaalada Beledweyne ee xarunta gobolka Hiiraan, ayaa si kulul uga hadlay amar kasoo baxay maamul goboleedka Riddada Hirshabeelle.
Shir jaraa’id oo Beledweyne ay ku qasadeen maamuleyaasha Iskuullada ee magaaladaasi, ayaa si adag looga soo horjeestay amar lacago baad ah lagu raadinayo oo kasoo baxay maamul goboleedka ashahaada la dirirka ah ee Hirhsbaeelle.
Maamuleyaashu waxay sheegeen in go’aankaan uu kasoo baxay wazaaradda waxbarashada ee maamul goboleedkaasi, kaasi oo arday waliba ku amraya in uu bixiyo lacag dhan 25 Dollar oo baad ah, taas oo aysan horay u qaadi jirin.
Waxay sidoo kale sheegeen in maamulkan ashahaada la dirirka ah uu amar ku bixiyay in ardaygii aan bixin lacagtaasi baadda ah uusan u fariisin doonin imtixaanka shahaadiga ee dugsiyada dhexe ee magaalada Beledweyne, balse waxaa taasi si adag uga hor yimid waalidiinta dhalay caruurta.
Mid ka mid ah maamuleyaasha dugsiyada magaaladaasi, ayaa warbaahinta u sheegay in wazaaradda waxbarashada ee maamulakasi ashahaada la dirirka ah ay ku qasabtay inay ardayda kaga soo qaadaan lacagtaasi, arintaasina ay tahay mid sharci darro ah.
Waalidiinta carruurta oo dhankooda shir jaraa’id qabsaday, waxa ay sheegeen inay la yaab ku noqotay amarka lacagta baadda ah ee carruurtooda uu kusoo rogay maamulka uu madaxa u yahay Cali Guudlaawe Xuseen, isla markaana aysan bixin doonin lacagahaasi, mid ka mid ah waalidiinta waxay sheegtay in dhibaato xooggan oo dhanka waxbarashada ah ay ka jirto degmadooda.
Bulshada qaybaheeda kala duwan ee ku dhaqan degmada Beledweyne waxay dhankooda sheegeen in wazaaradda waxbarashada maamul goboleedka isku magacaabay Hirhsbaeelle ay caqabad ku tahay magaaladooda, ayna gaartay heer ay isbaaro soo dhigato iskuullaadka magaalada Beledweyne.
