Wararka ka imaanaya dalka Maraykanka ayaa xaqiijinaya in dhaawac loo gaystay madaxweynihii hore ee waddankaasi, musharraxa madaxweyne ee lagu magacaabo Donald Trump, xilli uu khudbad u jeedinayay taageereyaashiisa oo isugu soo baxay fagaare kuyaal gobolka Pennsylvania.
Muuqaal lagu faafiyay baraha bulshada iyo mareegaha Internet-ka, ayaa muujinayay dhawaqa rasaas lagu furay Trump xilli uu ku guda jiray hadal jeedintiisa, taasi oo keentay in uu dhaawacmo.
Xubno ka tirsan hay’adda sirdoonka iyo booliiska, ayaa goobta si deg deg ah ugala cararay Donolad Trump, kaddib dhaawac kasoo gaaray rasaasta lagu beegsaday, isaga oo uu dhiig ka qubanayo ayayna ku qaadeen gaari nooca kuwa ammaankoodu adag yahay ah.
Xafiiska hayadda FBI-da Maraykanka, ayaa sheegtay in waxa dhacay uusan ahayn weerar toogasho ah oo kaliya balse uu ahaa isku day dil ah oo la doonayay in lagu khaarajiyo madaxweynihii hore ee Maraykanka ee Donolad Trump.
Booliska gobolka Pennslvania, ayaa sheegay in baaritaannada lagu wado dhacdadan lagu beegsaday Donolad Trump ay qaadan doonta maalmo, toddobaadyo iyo bilo, waxayna intaas ku dareen inay raadin doonaan macluumaad kasta oo ku hagaya inay helaan qof kasta oo ku lug leh dhacdadan.
