Wararka ka imaanaya dalka Kenya, ayaa sheegaya in la helay xubnaha dad si fool-xun loo dilay, kaddibna lagu tuuray meel gudaafad ah, arintaas oo argagax iyo cabsi ku beertay dadka Kenyaanka ah.
Booliiska Kenya, ayaa sheegay inay hadda gacanta ku hayaan boorsooyin ay ka buuxaan xubno dumar ah oo la jarjaray, kooxda dembi baarayaasha ah ayaa waxay dhankooda sheegeen inay gaareen goobta oo ku taal xaafadda isku raranka ah ee Mukuru ee caasimadda Nairobi.
Waaxda dembi-baarista Kenya ee magaceeda loo soo gaabiyo DCI, ayaa warbixinta ay soo saareen ku sheegay inay heleen maydadka ugu yaraan lix qof oo haween ah, kuwaas oo la jarjaray kaddibna xubnahooda oo googo’an lagu riday boorsooyin, kadibna lagu tuuray meel gudaafad ah.
Booliska Kenya, ayaa dhankiisa tilmaamay in dhacdadan ay noqotay mid argagax ku beertay dadka Kenyaanka ah, goobta ayay sheegeen inay gaareen markii ay soo gaareen wicitaanno kaga yimid dhanka dadka deegaanka.
Warka waaxda dembi-baarista iyo midka booliska, waxaa mid ka duwan sheegay kooxda ciidamada ammaanka dowladda Kenya u qaabilsan kormeerka, taas oo sheegtay in la helay maydadka 9 qof oo googo’an, kuwaas oo ay sheegeen in 7 ka mid ah ay haween yihiin.
Waddanka Kenya, waxaa sannadkii hore laga helay abaal wadareedyo laga soo saaray kaymo u dhow xeebta badweynta Hindiya, halkaas oo ay ku jireen meydadka boqolaal ruux oo gaalo Kenyaan ah.
Balse dhacdadan ayaa kusoo beegmayso, xilli dibadbaxyo waawayn ay ka soconayaan ismaamullada waddanka, kuwaas oo looga soo horjeedo canshuur kordhin ay sameysay dowladda, ciidanka Kenya ayaa lagu eedeeyay inay dileen daraasiin dad ah, halka gacanta ciidamada ammaanka Kenya ay ku maqanyihiin boqollaal qof oo aanan nolol iyo geeri lagu haynin.
