Diyaarad nooca aan duuliyaha lahayn ayaa maanta weerar ku beegsatay guriga uu Ra’iisul wasaaraha maamulka gumeystaha Yahuudda, Netanyahu ka degganyahay magaalada Qaysariya ee duleedka Tal’abiib, taasi oo laga soo diray dalka Lubnaan.
Xafiiska Netanyahu ayaa shaaciyay in diyaarad drone ah oo laga soo riday dhanka dalka Lubnaan ay si toos ah u beegsatay uguna qaraxday guriga ra’iisul wasaaraha maamulkaasi ee Qaysariya.
Dhankeeda warbaahinta maamulka Sahaayinda waxay sheegtay in qarax wayn uu ka dhashay diyaaradda aan duuliyaha lahayn ee lagu weeraray guriga Netanyahu, waxayna intas ku dareen in qaraxa diyaaraddu sameeyay dhawaq weyn.
Kanaalka 12-aad ee maamulka gumeystaha oo soo xiganayo ilo wareedyo ka tirsan xafiiska ra’iisul wasaaraha Sahaayinda ayaa sheegay in xilliga weerarku dhacaayay uu Netanyahu ka maqnaa guriga laga qarxiyay ee uu ku leeyahay Qaysariya.
Weerarkaasi kaddib waxaa uu qalqal xooggan soo wajahay saraakiisha gumeystaha, warbaahinta gumeystuhu waxay sheegtay in si wayn loo adkeeyay ammaanka saraakiisha maamulkaasi.
