Hindise shariciyeed lag soo jeediyay in dowlad madax banaan loo aqoonsado maamulka ashahaadda ladirirka somaliland ayaa la horkeenay aqalka hoose ee congresska Marykanka.
Hindisahan waxaa qoray laba xildhibaan oo ka tirsan Xisbiga jamhuuriga oo uu ka tirsan yahay madaxweynaha cusub ee dalkaas Donald trump.
Qaanuun gaaleedkan oo hada horyaala Kongareeska 118-aad ee Maraykanka walina aan cod loo qaadin ayaa waxaa lagu soo jeediyay in Mareykanku uu si rasmi ah u aqoonsado maamulka isku magacaabay Somaliland in uu yahay dal madax-bannaan oo ka go’an soomaaliya inteeda kale , sidoo kale wuxuu sharcigan doonayaa in Mareykanku ka sameeyo joogitaan diblomaasiyadeed magaalada Hargeysa ee gobollada waqooyi galbeed soomaaliya iyada oo loo marayo safaarad ama qunsuliyad.
Sharcigan oo mari doono qorshe dheer ayaa haddii uu helo codka loo bahanyhay si uu u dhaqan galo waxaa la hor geeyn doonaa madaxweynaha cusub ee Mareykanka Donald Trump oo hadii uu saxiixo ay ka dhigantahay in dowlada badan oo kale ay aqoonsan karaan maamulka Somaliand.
Rucleyntan ay wadaan xildhibaannada Mareykanka ee kasoo jeeda xisbiga Jamhuuriga ayaa imaanaya iyadoo ay dhawaanahay ay soo baxayeen warar sheegaya in Maamulka Yahuuda ee xoogga ku heysta dhulka falastiin uu daneynayo in uu saldhig Melleteri ka sameysato xeebaha badda Cas ee soomaaliya gaar ahaan magaalada Berbera.
Falanqeeyaasha ayaa aaminsan in sababta uu Abiy Axmed dib ugu dhigayay meelmarinta heshiiskii uu horraantii sanadkan lasaxiixday Muuse Biixi ay tahay isagoo ka war sugayay doorashadii Mareykanka ee uu Trump kusoo baxay waxaana xusid mudan in aqlabiyadda labada aqal ee baarlamaanka Mareykanka uu gacanta ku hayo xisbiga Jamhuuriga.
