Ugu yaraan 71 qof ayaa ku dhintay kadib shil gaari oo ka dhacay degmada Boona oo ku taalla Bariga mandiqadda Sidaama ee koonfurta magaalada Addis Ababa ee dalka Itoobiya.
Sida ay xaqiijiyeen mas’uuliyiinta xabashida ee Gobolka shilku ka dhacay iyo Dhaqaatiirta deegaanka oo la hadlay warbaahinta caalamka musiibada ayaa argagax ku ridday dadka deegaanka.
Maate Mengesha oo ah maamulaha deegaanka shilkku ka dhacay ayaa warbaahinta u sheegay in shilku ka dhacay buunddo dulmarta webiga Galana oo 125 kiiloomitir u jira magaalada Hawaas oo ah caasimadda mandiqadda Sidaama, Ninkan ayaa sheegay in dadka dhintay ay ahaayeen 71 rag ah iyo 3 dumar ah.
Agaasimaha Isbitaalka Boona oo magaciisa lagu sheegay Ashenafi Baliso, ayaa sidoo kale xaqiijiyey tirada dhimashada, isagoo waraysi siinayay warbaahinta maxalliga ah.
Sida dad goob joogayaal ah u sheegeen warbaahinta, shilkan ayaa dhacay kadib markii gaari xamuul ah oo ay dadbadan saarnaayeen uu xakameyn waayey darawalkii waday isagoo dul marayey buunddo dusheed arrinkaas oo marki dambe sababay inuu ku dhaco webiga Galana.
Gudoomiyaha degaanka shilku ka dhacay ayaa sheegay in dadka dhintay ay ka mid ahaayeen beeralleey ka yimid beeraha lagu abuuro kafeeyga iyo dhalinyaro deegaanka ah oo ka soo laabanayey aroos.
Abiy Axmed oo ah R/wasaaraha wadankaas ayaa bayaan uu soo saaray uga tacziyeeyay musiibadii dhacday, isagoo saraakiisha masuuliyiinta ugu baaqay in ay baaritaanno ku sameeyaan wixii dhacay.
Shilalka nuucaan ah ayaa sannaddadii dambe kusoo badanayay waddanka itoobiya, waxaana loo sababeynayaa hanaanka dhismooyinka waddooyinka oo aan wanaagsaneyn iyadoona xukuumaddu ay ka gaabisay ka shaqeynta bad qabka waddooyinka muhiimka u ah isku socodka gaadiidka dadweynaha.
