Ciidamada dowlada ay Buudhiyiintu leeyihiin ee Burma ayaa si bareer ah rasaas ugu furay dad shacab ah oo Muslimiin ah oo ka qaxayey dagaalada ka soo cusboonaaday dalkaasi xilli ay dadkaas isku dayayeen in ay ka gudbaan xad-beenaadka, una sii gudbaan dalka Bangaladesh.
Wariye ka tirsan Wakaaladda wararka AFP oo ku sugan magaalada xadka saaran ee Gumduun ee dhacda xad-beenaadka ayaa sheegay in uu tiriyey in ka badan 10 madfac oo ciidamada Xukuumada Baarma ay ku soo rideen dadka shacabka ah iyo rasaas aan tiro lalahayn oo ka dhaceysay qoryaha daran dooriga oo ciidamadu ay ku ridayeen dadka rayadka ah ee ka baxsanayey gumaadka wuxuushnimo ee ciidamadaasi.
Dadkan waxay u badnaayeen dumar iyo caruur, waxayna ku dhuumaaleysanayeen deegaanada buuraha ah ee u dhow xad-beenaadka labada dal sida ay sheegeen Saraakiisha ciidamada Bangaladesh iyo Wariyeyaasha ku sugan deegaanadaasi. Ilaa hadda lama sheegin wax dad ah oo lagu dilay rasaastaas iyo dad lagu dhaawacamay balse waxay kala yaacisay dadkii barakacayaasha ahaa.
Manzurul Hassan Khan oo ka tirsan saraakiisha ciidamada Bangaladesh ayaa sidoo kale xaqiijiyey in ciidamada Barma ay si bareer ah rasaas ugu fureen shacabka. “Waxay dadka shacab ah ku beegsanayeen madaafiic iyo hubka daran-dooriga, si bareer ah ayeyna u beegsanayeen dadka” ayuu yiri.
Golaha qowmiyadda Rohingya ee Yurub ayaa sidoo kale xaqiijiyey weerarkan, waxayna sheegeen in dadkan ay ka baxsanayeen dagaalada ka soo cusboonaaday galbeedka dalka, islamarkaana ay la kulmeen weerar kaga yimid ciidamada Buudhiyiinta ah. “Haa Waxaa xaqiiq in ciidamadu ay beegsadeen dadka shacabka ah, waxaan heynaa muuqaallo Video ah oo laga soo duubay halkaas” sidaas waxaa yiri xubin u hadlay golahaasi.
Wararka qaar ayaa sidoo kale sheegaya in ciidamada military-ga Burma oo ay wehliyaan kooxo buudhiyiin xagjir ah oo ku hubeysan faasas, seef iyo budad ay weerareen qoysas Muslimiin ah oo aanan hubeysneen oo ku sugnaa gobolka Rakhiin.
Falalkan wuxuushnimo ee ay geysanayaan ciidamada Buudhiyiinta ee dowlada Burma iyo bulshadooda ayaa imaanaya maalin un ka dib markii weerar xoogan oo lagu laayey ciidamada ka tirsan Police-ka iyo military-ga Burma lagu qaaday in ka badan xarumo Police iyo saldhig military oo ku yaalla gobolka ay Muslimiinta leeyihiin ee ku hoosjira gumeysiga Buudhiyiinta.
Mas’uuliyadda weerarkan oo lagu dilay in ka badan 90 ruux waxaa sheegtay ciidamado la magacbaxay “Ciidamada Bad-baadinta Rohingya” oo ka tirsan xarako loo yaqaano Al-Yaqiin oo ah koox Islaami ah oo hubeysan oo sanadkii la soo dhaafay ku dhawaaqday olole dagaaleed ka dhan ah military-ga Burma oo lagu difaacayo Muslimiinta.
