Sida ay sheegayaan warbaahinta caalamiga ah go’aanno cusub oo la yaab leh oo kasoo baxay boqorka Aala-Sucuud ayaa lagu tilmaami karaa dhul gariir dhanka go’aannada ah oo nqoday kuwa lama filaan ah.
Amar kasoo baxay boqor Salmaan bin Cabdil Caziiz ayaa xilka looga qaaday wasiiro katirsan maamulka Aala-Sucuud, Saraakiil ciidan, iyadoona xabsiga la dhigay wasiiro hore, iyo rag katirsan boqortooyad oo caan ahaa.
Sida ku cad amarka kasoo baxay boqorka Aala-Sucuud ayna baahisay wakaaladda wararka ee Waas, waxaa xilkiisa laga qaaday wasiirka Ilaalada wadanka Al-Amiir Mutcib bin Cabdillaah, iyadoona bedelkiisa jagadaas loo dhiibay Khaalid bin Cayaaf.
Madaxda xilalka laga qaaday waxaa kamid ah wasiirkii Dhaqaalaha Caadil bin Muxamed bin Faqiih, iyadoona jagadaas loo dhiibay Muxamed Al-Towjari.
Waxaaa sidoo kale shaqada laga eryay taliyihii ciidamada Badda maamulka Aala-Sucuud Cabdullaahi bin Suldaan, waxaana laga dhigay howlgab, iyadoona jagada laga eryay loo dhiibay nin lagu magacaabo Fahad bin Cabdillaahi Al-Qafiili.
Dhamaan mas’uuliyiinta xilalka laga qaaday waxaa lagu eedayay musuqmaauq, wax isdaba marin iyo ineysan si wanaagsan uga soo bixin howshii loo dhiibtay, iyadoona baaritaanno lagu billaabay.
Amarka kasoo baxay boqor Salmaan waxaa sidoo kale lagu sheegay in ladhisay hay’ad la dagaalanta Musuqmaasuqa, oo baaaritaanno sameyn doonta, waxaana hay’adan madax u ah dhaxalsugaha dalka ahna wasiirka difaaca oo uu dhalay boqorka, laguna magacaabo Muxamed bin Salmaan.
Tobanaan Ruux oo ay ku jiraan wasiiro hore, iyo shakhsiyaad caan ah ayaa xabsiga la dhigay, waxaana kamid ah dadkaas Turki bin Naasir oo ahaa madixii hore ee hay’adda saadaasha iyo ilaalinta bii’ada, Al-Waliid bin Dhalaal oo kamid ah boqortooyada ahna ganacsade Billinoer ah, Waliid Ibraahim oo ah ninka iska leh TVGA MBC, amiirkii hore ee magaalada Riyaad Turki bin Cabdullaah, Maxamuud Al-Dhabiishi oo horay jagooyin uga soo qabtay maamulka Aala-Sucuud, Fahad bin Cabdillaahi oo horay usoo noqday kuxigeenka Wasiirka difaaca maamulka Aala-Sucuud.
Awaamiirta soo baxday habeenkii xalay oo Sabti ahayd aad bay u badnaayeen waxaana kamid ah iyadoo gebi ahaanba la mamnuucay in diyaaradaha gaarka loo leeyahay ama sida mas’uuliyiin gaar ah ay ka duulaan garomada diyaaradaha maamulka Aala-Sucuud, taas oo muujineysa in qabqabashad ay sii socon doonto.
Lama oga halka uu ku dambeyn doono xaalka dhulka Xarameynka oo ay majaraha u qabteen hogaamiyaal fud fudud, dagaal adagna kula jira Islaamka iyo Muslimiinta, waxaana sidoo kale hogaamiyaashan hadda talada haya laga dareemayaa madaxtinimo jacayl xad dhaaf ah taas oo ku riixeysay in xitaa kuwii iyaga la shaqeynayay ay Xabsiyad ku guraan.
