Kadib kulan ay xarunta Q.Midoobe ee magaalada New York ee wadanka Mareykanka ku yeesheen dowladaha ku bahooday UN-ka ayay ku laaleen go’aankii Donald Trump ee magaalada Qudus u aqoonsanayay Caasimadda Yahuudda.
Kulanka oo ahaa mid Xasaasi ah ayay inta badan dowladaha xubnaha ka ah Q.Midoobe u codeeyeen qaraarka diidaya aqoonsigii Trump ee Yahuudda siinayay magaalada Qudus ee dhulalka Filasdiin.
128 dowladood ayaa ogolaatay in ladiido Go’aankii Trump halka 9 dowladood ay diideen sidoo kale 35 dowladood ayaa ka aamusay amarkii Trump ee dhigayay magaalada Qudus loo raro safaaradda Mareykanka islamarkaana magaaladaas laga dhigo Caasimadda waxa loogu yeero Israa’iil.
Codeynta ayaa timid xilli madaxweynaha Mareykanka uu ku hanjabay in ay dhaqaalaha ay ka jari doonaan dowladaha ay taageeraan haddii ay u codeeyaan tallaabada ka dhanka qaraarkii uu Qudus ka qaatay 6 December 2017.
Waxaa xusid mudan in codeynta Cusub ee Caawa kasoo baxday Q.Midoobe aysan macna weyn laheyn sababtoo ah ma ahan qaraar ku qasbaya in uu ka laabto go’aankii hore ee Uu magaalada Qudus ugu aqoonsaday Caasimadda Yahuudda wuxuuna ka dhiganyahay Cambaareyn oo kaliya, codeyntii Macnaha ku fadhiday waxay dhacday isniintii lasoo dhaafay xukuumadda Washington ayaana diidmada qayaxan ee Veto-ga u isticmaashay.
