Waxaaa sii xoogeystay khasaaraha ka dhashay dagaal beeleed dib uga qarxay deegaanno katirsan gobolka Sanaag ee gobollada waqooyi galbeed dalka Soomaaliya.
Wararka ka imaanaya degmada Ceel Afweyn ee gobolka Sanaag ayaa sheegaya in ugu yaraan 20 qof ay ku dhinteen dagaal beeleed ka socda dhulka miyiga ah, guddoomiyaha degmada ayaa sheegay in dagaalku uu shalay markale dib uqarxay wuxuuna walaac ka muujiyay in dagaalladu ku faafaan dhul hor leh.
Goob Joogayaal ku sugan tuulada Dararweyne ayaa warbaahinta u sheegay in dhinacyada dagaallamaya ay isku adeegsanayaan hubka waaweyn oo jugtiisa laga maqlayo dhulka Miyiga ah.
Maleeshiyaadka dirirtu u dhaxayso ee kasoo kala jeeda beelaha walaalaha ah ayaa loogu baaqay in ay xabadda joojiyaan, salaadiinta gobolka Sanaag ayaa dhankooda sheegay in ay wadaan waan waan nabadeed oo xiisadda lagu qaboojinayo.
Khasaaraha dhimashada oo shalay gelinkii hore ahaa 16 ayaa hadda sii kordhay oo gaaray 20 qof halka dhaawacu uu ka badan yahay 15 qof sida ay sheegeen ila caafimaadka gobolka Sanaag.
Muuse Biixi oo ah hoggaamiyaha maamulka isku magacaabay Somaliland ayaa isna ugu baaqay beelaha dagaallamaya in ay xabadda Joojiyaan “Colaad wiilbaa ku dhintee wiil kuma dhasho ee walaalayaal si shuruud la’aan ah ujoojiya dirirta” ayuu yiri Muuse Biixi.
Dhammaan Gobollada dalka Soomaaliya waxaa ka dhaca dagaallo beeleedyo u dhaxeeya dad ehel ah waxaana muuqata in Soomaalidu aysan wali ka gudbin qabyaaladeysiga iyadoo dalkeeda ay qabsanayaan ciidamada gumeysiga Itoobiya iyo Kenya.
