Xaalad adag ayaa wali ka taagan mandiqadda ghuudada Bari ee duleedka magaalada dimishiq caasimadda wadanka suuriya halkaas oo maalintii 19-aad lagu gummaadayo shacab muslimiin ah.
Wararka ka imaanaya suuriya ayaa sheegaya in kumanaan katirsan maleeshiyaadka shiicada iiraan iyo ciidamada nidaamka bishaar al-asad ay guluf dagaaleed hor leh ka wadaan mandiqadda oo ay ku hareeraysanyihiin in kabadan nus milyan qof.
Warfaafinta afka nidaamka bishaar al-asad ku hadasha ayaa sheegtay in ciidamada huwanta cadawga ay hareereeyeen magaalada dowmah ee ghuudda kamid ah islamarkaana ay geysanayaan toogashooyin.
Dad ku sugan magaalada dowmah ayaa sheegay in duqeymo ba’an ay magaaladu saaka ku waabariisatay kadibna waxaa bilaawday weerar xoog kugal ah oo ay sameynayaan maleeshiyaadka cadawga.
Wariye ku sugan deegaanka Masraaya ayaa warbaahinta u sheegay in ciidamada cadawga ay dhan walba weerar ka bilaabeen waana isku daygii ugu dambeeyay oo ay ku doonayaan in ay si buuxda ugu qabsadaan mandiqadda ghuudada bari.
Meydadka ayaa daadsan waddooyinka waxaana la awoodi waayay in la aaso, mid kamida saraakiisha caafimaadka ayaa warbaahinta u sheegay in boqolaal Meyd ay wali yaallaan magaalada islamarkaana la awoodi waayay in la aaso sababo la xiriira duqeymo aan kala joogsi laheyn oo mandiqadda ka socda.
Guddiga caafimaadka deegaanada hareeraysan ayaa warbixin ay soo saareen waxay ku xaqiijiyeen in 19 maalmood oo dagaallo iyo duqeymo socdeen ay dhimashadu gaartay kun qof dhaawacyaduna waa kumanaan kale.
