Dagaallo culus ayaa maanta markale dib uga qarxay deegaan hoos yimaad magaalada Marka ee xarunta gobolka Shabeellaha Hoose.
Wararka ka imaanaya deegaanka Ceelwareegoow ayaa sheegaya in dagaal culus oo dhaxmaray ciidamada Shabaabul Mujaahidiin iyo kuwa shisheeyaha AMISOM uu sababay in mujaahidiintu ay la wareegaan gacan ku heynta deegaanka iyo gaari gaashaaman.
Ilo wareedyo ayaa xaqiijinaya in ciidamada Al Shabaab ay dagaal culus lagaleen ciidamo Yugaandheys ah oo ilaalo ka hayay gaari ku waxyeelloobay dagaal shalay ka dhacay Ceelwareegoow islamarkaana ay lawareegeen gaariga oo ay saaranyihiin agabyo melleteri.
Khasaara dhimasho iyo dhaawac ah ayaa la sheegay in uu ciidamada AMISOM kasoo gaaray dagaalka, xoogaga Al Shabaab ayaa si buuxda gacanta ugu haya deegaanka halka ciidamada shisheeye ay ufirxadeen dhanka saldhigga ay ku leeyihiin garoonka diyaaradaha Lambar50.
Dhinaca kale ugu yaraan sedax askari oo katirsan ciidamada AMISOM ayaa lagu dilay qarax lagula eegtay degmada Baraawe ee isla gobolka sh/hoose, qaraxa ayaa la sheegay in lagu qariyay goob isku imaatin ah oo maalintii ay degaaan ciidamada Uganda habeenkiina ay ka guuri jireen.
War rasmi ah oo kasoo baxay Xarakada Al Shabaab ayay ku sheegatay mas’uuliyadda weeraradan khasaaraha dhaliyay ee ka dhacay Ceelwareegoow iyo Baraawe
