Wararka Ka imaanayo Dhulka Filistiin qeybtiisi Gumeysiga Yuhuuda ku hoos jiro ayaa sheegaya in Maamulka Yuhuuda ay xireen Hawada ay la wadaagaan Wadanka Suurya kadib cabsi xoogan oo soo food saartay.
Maamulka Yuhuuda ayaa shaaciyey in joojiyeen dhamaan duulimaadyadii diyaaradaha e dul mari jiray Buuraha Jooolaan ilaa deeganada dhaca Bariga Wabiga Urdun, xilli ay halkaas ka jirto dhiillo colaadeed.
Maamulka Yuhuuda ayaa sheegay inay ciidankooda heegan buuxa galiyeen si ay uga feejignaadaan weeraro gaadmo ah oo uga yimaada Xuduud-beenaadka wadanka Suuriya.
Xiisadan ayaa u dhexeysa Yuhuuda iyo Maleeshiyaatka Iiraan taageersan ee ku sugan gudaha wadanka Suuriya.
Wargeyska Haaretis ee yuhuudu ay leedahay ayaa qoray in madaxda Tala Abiib ay ku wargeliyeen wadamada Mareykanka iyo Ruushka iney weerar ku qaadi doonaan gudaha Iiraan hadii ay weerar kala kulmaan Maleshiyaadka Shiicada ah ee ku sugan Syria iyo Lubnaan.
Arintaan ayaa imaaneysa xilli Labo Maalin ka hor Diyaarado loo maleynayo inay Yuhuudu leedahay ay duqeyn u geysteen Xero Maleeshiyaatka Shiicada ah ee Iiraan ay ku leeyihiin Gudaha wadanka Suuriya ayna ku dileen 19 Iiraaniyiin ah, waxaana kasii horeyey weerarkaan Mid kale oo diyaradaha Dagaalka Yuhuuda ay ku duqeyen Garoonka T4 oo la sheegay in Iiraan ay ka hagto kuna farsameyso diyaaradaha aan duuliyaha lahayn.
Maamulka Yuhuuda ayaa sheegaya inuusan ogolaan doonin in Askarta Iiraaniyiinta ah iyo maleeshiyaatka shiicada ah ee taageerada siinaya nidaamka Bashaar Al-Asad ay kasoo ag-dhawaadaan xuduud-beenaadka wadanka Suuriya uu la wadaago dhulka la haysto ee Falastiin.
Diyaarada dagaalka Yuhuuda ayaa dhowr jeer oo hore weerar dhanka cirka ah ku qaaday saldhigyo ku yaalla gudaha Suuriya, iyadoo sheegeeysa inay beegsanayso saraakiil ka tirsan ciidanka wadanka Iiraan iyo maleeshiyaatka shiicada ah, waxaana jira hanjabaado dhowr ah oo kasoo yeeray madaxda wadanka Iiraan kuwaas oo sheegaya inay Yahuuda ka aargoosan doonaan, balse weli lama soo sheegin wax tallaabo ah oo ay qaadeen.
Wadanka Suuriya ayaa waxaa ku sugan kumanaan saraakiil, ciidamo iyo maleeshiyaat Iiraaniyiin ah oo ka garab dagaalamaya nidaamka Nusayriga ah ee Bashaar Al-Asad, waxaana ay Yuhuudu doonaysaa in Shiicadu ay ku ekaato oo kaliya xasuuqa dadka Ahlu Sunnaha ah ee reer Suuriya, balse aysan kasoo agdhawaanin xuduud-beenaadka u dhexeeya Suuriya iyo dhulka Falastiin ee ay Yuhuudu gumaysato.
