Dowladda Mareykanka ayaa ku dhawaaqday in Maxbuuskii ugu horreeyay ay kasii daysay xabsiga fadeexadda ku caanbaxay ee Guantanamo Bay tan iyo markii uu talada aqalka cad la wareegay Donald Trump.
Wasaaradda difaaca Washington ayaa xaqiijisay in ay sii daysay Maxbuus lagu magacaabo Axmed Max’med Axmed kaasi oo 16 sano oo kamid ah noloshiisa ku qaatay xabsiga Guantanamo Bay.
Maxbuuska ayaa loo gacan geliyay Nidaamka dabadhiifka Sacuudiga oo isbaheysi weyn la ah dowladda Mareykanka, Maxbuuskan lasii daayay ayaa xabsiga Guantanamo Bay loo dhaadhiciyay sanaddii 2002 wuxuuna ku eedeysnaa in uu ka qeyb qaatay weerar lagu qaaday Markab nuuca naftada xambaara ah oo kusii jeeday xeebaha dalka Yemen.
Qareenkii u doodayay Maxbuuska ayaa sheegay in tacdiibin daran uu kala kulmay ciidamada Mareykanka 16-kii sanadood ee uu ku xirnaa xabsiga fadeexadda ku caanbaxay ee Guantanamo Bay.
Wasaaradda Difaaca Mareykanka waxay sheegaysaa in sii deysmada Axmed Max’med Axmed ay tirada maxaabiista ku xiran Xabsiga ka dhigeyso 40 Maxbuus, hoggaamiyaha cunsuriga Mareykanka Donald Trump ayaa markii uu xilka madaxtinimo qabtay ku goodiyay in maxaabiis hor leh uu udhaadhicin doono Xabsigan kuyaal gacanta Kuba.
Sanaddii 2001 ayuu G.W.Bush madaxweynihii hore ee Mareykanka wuxuu furay xabsiga Guantanamo Bay xilligaas oo America iyo xulufadeeda ay iclaamiyeen xamlada salbiiga ah ee ka dhanka ah muslimiinta waxayna duullaanno ku qaadeen wadanka Afghanistan kadibna waxaa xigay duullaankii Ciraaq.
Fadeexaddii Guantanamo Bay ayaa caalamka umuujisay waji dhabta ah ee Dowladda Mareykanka oo sheegan jirtay faafinta xuriyadda iyo waxa loogu yeero Dimuquraadiyadda.
