Wararka naga soo gaaraya magaalada Buula-Mareer ayaa xaqiijinaya in qarax culus lagu weeraray ciidamo katirsan dowladda oo ku sugnaa bartamaha magaalada.
Qaraxa oo ahaa nooca dhulka lagu aaso ayaa ka kacay goob ay fadhiistaan ciidamada dowladda, islamarkaana u ah Isbaaro ay ku baadaan dadka iyo gawaarida rakaabka ah.
Ugu yaraan 3 Askari ayaa ku dhintay qaraxa, oo uu ku jiro taliyihii Isbaarada ee ciidamada dowladda, waxaana ku dhaawacmey 4 kale.
Qaraxyada lagu beegsanayo Askarta iyo ciidamada dowladda ayaa maalmahan soo badanaya, waxaana qarixii Buula-Mareer uu imaanayaa xilli gelinkii dambe ee shalay deegaanka Ceelasha qaraxyo mataano ah lagula eegtay ciidamo katirsan PS-ta dowladda, kuwaas oo waxyeelo adag ay gaartay, waxaana dhimasho iyo dhaawac ku noqday 17 askari.
Dhinaca kale wararka ka imaanaya gobolka Sh/dhexe ayaa sheegaya in iska hor’imaadyo xooggan ay ka dhaceen inta u dhaxaysa deegaannada Ceelbaraf iyo Ceeldheere.
Dagaalka ayaa yimid kadib markii ciidamada wilaayada Islaamiga Sh/dhexe ay weerar kula jarmaadeen maleeshiyaad katirsan DF-ka oo isbaaro dhigtay halka loo yaqaan Xalfooleey.
Ilo wareedyo ayaa sheegaya in 2 askari ay ku dhinteen dagaalka, wararkii ugu dambeeyay ayaa sheegaya in maleeshiyaadka DF-ka ee isbaaraleyda ah ay ubaqa carareen dhanka degmada Jalalaqsi ee gobolka Hiiraan.
Dadka deegaanka ayaa soo dhoweeyay howlgalkan Burcad sifeyska ah ee ciidamada Mujaahidiintu ka fuliyeen halka ay iska galeen gobollada Hiiraan iyo Sh/dhexe, maleeshiyaadka ayaa bishii lasoo dhaafay degaya wadada Xalfooleey halkaas oo ay dil iyo kufsi ugu geysteen dad musaafur ah.
